Uncategorized

 ગુજરાતમાં દર વર્ષની જેમ આ વર્ષે પણ રણોત્સવનું આયોજન કરવામાં આવ્યું છે. જ્યાં દેશ-વિદેશથી મોટી સંખ્યામાં પ્રવાસીઓ કચ્છનું સૌંદર્ય માણવા આવે છે. આ વર્ષે રણોત્સવની શરૂઆત 11 નવેમ્બરથી થવાની છે. પ્રવાસીઓ 15 માર્ચ સુધી આ રણોત્સવનો આનંદ માણી શકશે. જેમાં લોકો ટેન્ટ સિટીમાં રોકાઈને પ્રકૃતિનો અનેરો આનંદ માણતા હોય છે. રણોત્સવમાં ટેન્ટ સિટીમાં લોકો કચ્છના સફેદ રણના સૌંદર્યની સાથે પરંપરાગત ભોજન અને લોક સંસ્કૃતિનો પણ આનંદ માણે છે. આ ટેન્ટ સિટીમાં રહેવાનો અનુભવ પ્રવાસીઓ માટે ફાઇવ સ્ટાર હોટેલ કરતાં પણ વધારે હોય છે. કચ્છના રણોત્સવમાં ટેન્ટ સિટીમાં રહેવા માટે https://www.rannutsav.com/ વેબસાઇટ પર જઈને તમે તમારા માટે ટેન્ટ બુક કરાવી શકો છો.

અમદાવાદ સિવિલ હોસ્પિટલમાં નવા વર્ષમાં વધુ એક અંગદાન થયું છે. સિવિલ હોસ્પિટલમાં થયેલા આ 172માં ગુપ્ત અંગદાનની વિગતોમાં ગત 6 નવેમ્બરના રોજ એક દર્દીનો અકસ્માત થતા માથામાં ગંભીર ઇજાના કારણે સારવાર અર્થે સિવિલ હોસ્પિટલ ખાતે દાખલ કરાયો હતો. ‌આધેડ વયના વ્યક્તિને સારવાર દરમિયાન સિવિલ હોસ્પિટલના ડોક્ટરોએ તારીખ 8 નવેમ્બરના રોજ બ્રેઇનડેડ જાહેર કર્યા હતા. ત્યારબાદ સિવિલ હોસ્પિટલ ના ડોક્ટરો તેમજ જાણીતા સ્કીન સ્પેશ્યાલિસ્ટ રેખાબેન સોલંકીનાં પ્રયાસોથી દર્દીના પરિવારજનો અંગદાન કરવા સંમત થયા હતા. આ અંગદાનથી સિવિલ હોસ્પિટલને એક લીવર તેમજ બે કીડનીનું દાન મળ્યું. સિવિલ હોસ્પિટલની એવોર્ડસ પ્રાપ્ત થયોઃ ડો. રાકેશ જોષી અમદાવાદ સિવિલ હોસ્પિટલના સુપ્રીન્ટેન્ડન્ટ ડો. રાકેશ જોષીએ વધુમાં જણાવ્યું હતું કે, દિલ્હી ખાતે 5 નવેમ્બરના રોજ યોજાયેલ 16માં FICCI એવોર્ડ સમારંભમાં ઓર્ગન ડોનેશનની દિશામાં ઉત્કૃષ્ટ કામગીરી બદલ સિવિલ હોસ્પિટલ અમદાવાદને નામાંકીત ક્રિકેટર કપીલદેવનાં હસ્તે એવોર્ડ એનાયત કરવામાં આવ્યો છે. જે સિવિલ હોસ્પિટલ તેમજ રાજ્યના આરોગ્ય વિભાગ માટે ખુબ ગૌરવની વાત છે. 558 અંગોનું દાનથી 540ને જીવનદાન મળ્યું આ અંગદાન થકી સિવિલ હોસ્પિટલ દ્વારા અત્યાર સુધીમાં કુલ 558 અંગોનું દાન મળેલ છે. જેના થકી 540 વ્યકિતઓને જીવનદાન મળ્યુ છે. આ અંગદાનથી દાનમાં મળેલ બે કિડની તેમજ એક લીવરને સિવિલ મેડિસિટી કેમ્પસની કિડની હોસ્પિટલમાં જરૂરિયાતમંદ દર્દીમાં પ્રત્યારોપણ કરવામાં આવશે. અત્રે ઉલ્લેખનીય છે, સિવિલ હોસ્પિટલમાં અત્યાર સુધીમાં 310 કિડની, 149 લીવર, 52 હૃદય, 30 ફેફસા, 9 સ્વાદુપિંડ, 2 નાના આંતરડા, 5 સ્કીન અને 116 આંખોનું દાન મળ્યું છે.

પદ્મશ્રી અને રાષ્ટ્રપતિ પુરસ્કારથી સન્માનિત મુસાફિર રામ ભારદ્વાજનું શુક્રવારે સાંજે લગભગ 6.45 કલાકે નિધન થયુ હતું. 103 વર્ષીય રામ ભારદ્વાજની કેટલાક સમયથી તબિયત ખરાબ હતી, શનિવારે પઠાણકોટના દુનેરામાં પંચતત્વમાં વિલિન થયા હતાં. બ્રિટિશ કાળમાં હિમાચલ પ્રદેશના ચંબા જિલ્લાના ભરમૌર સબ-ડિવિઝનના સચુઈન ગામમાં જન્મેલા મુસાફિર રામ ભારદ્વાજે 13 વર્ષની વયથી પારંપારિક વાજિત્ર પૌન માતા વગાડવાની શરૂઆત કરી હતી. તે હાલમાં પંજાબના પઠાણકોટ જિલ્લાના ધારકલાન તહસીલ હેઠળના દુનેરાના ધારકલાનમાં રહેતા હતાં. તેમના નિધનથી રાજ્યમાં શોકનો માહોલ જોવા મળ્યો હતો. ભગવાન શિવની આરાધના કરતાં મુસાફિર રામ ભારદ્વાજને તેમની ઉત્કૃષ્ટ પૌન વાદનની કળા માટે 2014માં પદ્મશ્રી એવોર્ડથી સન્માનિત કરવામાં આવ્યા હતાં. તેઓ તેમના પિતા પાસેથી આ વાદન વગાડતાં શીખ્યા હતાં. 2009માં રાષ્ટ્રપતિ એવોર્ડથી પણ સન્માનિત કરાયા હતાં. આ સિવાય અન્ય ઘણા રાષ્ટ્રીય એવોર્ડ પણ મેળવ્યા હતા.

સેન્સેક્સ 80333 ઉપર બંધ થતાં 81111 જોવાશે મુંબઈઃ ગત સપ્તાહ ફોરેન પોર્ટફોલિયો ઈન્વેસ્ટરો (એફપીઆઈઝ)ની એકધારી રોજ વેચવાલીના પરિણામે શેરોમાં ધોવાણ વધતું જોવાયું છે. અમેરિકામાં નવા રાષ્ટ્ર પ્રમુખ તરીકે ડોનાલ્ડ ટ્રમ્પના વિજય જાહેર થવાના દિવસે વૈશ્વિક બજારોની સાથે ભારતીય શેર બજારોમાં તેજીના ફૂંફાળા જોવાયા હતા. પરંતુ તુરંત બીજા દિવસે તેજીનો આ ઉન્માદ શમતો જોવાઈ ટ્રમ્પ સરકારની અણધારી ટેરિફમાં વધારા સહિતની અપેક્ષિત નીતિઓ અને ચાઈના ફેકટરે બજારમાં વેચવાલી વધતી જોવાઈ છે. સપ્તાહના અંતે સેન્સેક્સ, નિફટીમાં મર્યાદિત ઘટાડો બતાવીને ફરી સ્મોલ, મિડ કેપ શેરોમાં ફંડોએ ઓફલોડિંગ કરીને દરેક ઉછાળે નફો ઘરભેગો કરવાનું ચાલુ રાખ્યું છે. અહીંથી ગત અઠવાડિયે જ કહ્યું હતું કે, શેરોમાં હાલ તુરત ડિફેન્સિવ બનવું અને સિલેક્ટેડ રહેવું જરૂરી છે. વિદેશી ફંડોની અવિરત વેચવાલી અટકે નહીં ત્યાં સુધી બજારમાં સાવચેત રહેવું આવશ્યક છે. જીઓપોલિટીકલ ટેન્શન સાથે ક્રુડ ઓઈલમાં ભડકાના સંજોગોમાં અને ફોરેન ફંડોની અવિરત વેચવાલીના સંજોગોમાં લોકલ ફંડો પર રિડમ્પશનનું પ્રેશર આગામી દિવસોમાં આવી શકે છે, આ પરિસ્થિતિમાં નવેમ્બર મહિનો ખાનાખરાબીનો નીવડી શકે છે એટલે જે શેરોમાં માતબર નફો મળતો હોય એ ઘરભેગો કરવો સલાહભર્યું છે. ગત સપ્તાહના અંતિમ દિવસોમાં સ્થાનિક સંસ્થાકીય રોકાણકારો એટલે કે લોકલ ફંડો-મ્યુચ્યુઅલ ફંડોની ખરીદી પણ ધીમી પડતી જોવાઈ છે. જેથી હજુ આગામી દિવસોમાં નવી ખરીદી કે એવરેજ કરવાથી દૂર રહેવું સલાહભર્યું છે. હાલ તુરત નવી ખરીદીની ઉતાવળ કરવી નહીં. આગામી સપ્તાહમાં નિફટી સ્પોટ ૨૩૭૭૭ની ટેકાની સપાટીએ ૨૪૪૪૪ ઉપર બંધ થતાં ૨૪૬૬૬ અને સેન્સેક્સ ૭૮૩૩૩ની ટેકાની સપાટીએ ૮૦૩૩૩ ઉપર બંધ થવાના સંજોગોમાં ૮૧૧૧૧ જોવાઈ શકે છે.

શહેરના રીવરફ્રન્ટના રસ્તાઓ પર બાઇક અને સ્કૂટરને પુરઝડપેે ચલાવીને ટીનેજર બાળકો અને યુવાનો દ્વારા કરવામાં આવતા સ્ટંટના કારણે  વાહનચાલકોને નિયમિત રીતે હાલાકી પડે છે. એટલું જ આવા તત્વોના કારણે અન્ય વાહનચાલકોના જીવને પણ જોખમ રહે છે. થોડા દિવસ પહેલા સ્કૂટર પર પુરઝડપે જતા ત્રણ સગીર વયના બાળકોને અકસ્માત નડયો હતો. જે અંગે પોલીસે બાળકોને સ્કૂટર આપનાર વાલી વિરૂદ્ધ ગુનો નોંધ્યો હતો.  રીવરફ્રન્ટના રસ્તા પર સાંજના સમયે રેસ લગાવવાના તેમજ રીલ માટે સ્ટંટ કરતા વાહનચાલકોને કારણે પણ નાના મોટા અકસ્માત થતા રહે છે. એટલું જ નહી રીવરફ્રન્ટ પર ૪૦ કિલોમીટર પ્રતિ કલાકની ગતિની મર્યાદા રાખવામાં આવી છે. પરંતુ, ઘણીવારે ૮૦ થી ૯૦ કિલોમીટર પ્રતિ કલાકની ઝડપે પણ વાહન ચલાવવામાં આવે છે. આમ, રીવરફ્રન્ટ પૂર્વ અને પશ્ચિમના રસ્તા પર કેટલાંક વાહનચાલકોની બેદરકારીને કારણે મોટી ઘટના બની શકે તેમ છે.  આ બાબત ટ્રાફિક વિભાગના ઉચ્ચ પોલીસ અધિકારીઓની સામે આવતા તેમણે  રીવરફ્રન્ટ રસ્તા પર પુરઝડપે વાહન ચલાવતા , સ્ટંટ કરતા લોકો સામે આકરી કાર્યવાહી કરવા માટે સુચના આપી છે. એટલુ જ  ઓવર સ્પીડમાં જતા વાહનચાલકો વિરૂદ્ધ દંડની કામગીરી વધારવા માટે પણ આદેશ આપ્યા છે. સાબરમતી રિવરફ્રન્ટ ડેવલપમેન્ટ કોર્પોરેશન અને પોલીસ દ્વારા નિર્ભયા પ્રોજેક્ટ અંતર્ગત સાબરમતી રિવરફ્રન્ટ પર આવેલા રોડ અને વિવિધ જગ્યાઓ પર સીસીટીવી કેમેરા લગાવવામાં આવ્યા છે. રિવરફ્રન્ટ પર દિન પ્રતિદિન ચોરી, લૂંટફાટ, છેડતી અને તોડબાજીની ઘટનાઓ વધતાં ભાજપના ધારાસભ્યો દ્વારા રિવરફ્રન્ટ પર સીસીટીવી કેમેરા લગાવવા માટેની રજૂઆત કરવામાં આવી હતી. જેના પગલે પોલીસ દ્વારા સેફ સિટી નિર્ભયા પ્રોજેક્ટ અંતર્ગત રિવરફ્રન્ટના બંને છેડા તરફ વાસણાથી લઈ વાડજ અને દાણીલીમડાથી લઈ શાહીબાગ સુધી જેટલા પણ ખુલ્લી જગ્યાઓ આવેલા છે ત્યાં થોડા થોડા અંતરે નિર્ભયા પ્રોજેક્ટ અંતર્ગત મુવિંગ સીસીટીવી કેમેરા લગાવવામાં આવ્યા છે. રિવરફ્રન્ટ રોડ ઉપર ટ્રાફિકના નિયમોનું પાલન થાય તેના માટે 16 જેટલા વિવિધ જંકશનનો ઉપર સીસીટીવી કેમેરા લગાવવામાં આવ્યા છે જેનાથી જે પણ વાહન ચાલક દ્વારા ટ્રાફિક ના નિયમોનો ભંગ કરવામાં આવે તેને ઈ-મેમો મોકલવામાં આવશે. જે ચાર રસ્તા ઉપર ટ્રાફિકના નિયમોના માટે લગાવેલા સીસીટીવી કેમેરા નથી, ત્યાં નાના સીસીટીવી કેમેરા લગાવવામાં આવ્યા છે.

ગુજરાતમાં આઠ મ્યુનિસિપલ કોર્પોરેશનમાં મેયરોની ચૂંટણી અંગેનું રોસ્ટર શેડ્યૂલ જાહેર કરવામાં આવ્યું છે, ત્યારે આગામી 2026માં ચૂંટણી થશે. જેમાં મેયરોની અઢી-અઢી વર્ષની મુદત મળશે. અગાઉ 2021માં મેયરની ચૂંટણી થઈ હતી, જ્યારે જૂનાગઢમાં છેલ્લે 2019માં મનપાની ચૂંટણી થઈ હતી.  રાજ્યમાં અમદાવાદ, ગાંધીનગર, સુરત, વડોદરા, રાજકોટ, ભાવનગર, જામનગર અને જૂનાગઢ સહિત આઠ મ્યુનિસિપલ કોર્પોરેશનમાં મેયરોની ચૂંટણીનું નોટિફકેશન જાહેર કરાયું છે. જેમાં અમદાવાદમાં આગામી મેયર પ્રથમ અઢી વર્ષ માટે પછાત વર્ગમાંથી અને બીજા અઢી વર્ષ માટે મહિલા મેયર મળશે. ગાંધીનગરમાં મેયર માટે અઢી-અઢી વર્ષની મુદતમાં બેકવર્ડ ક્લાસના અને મહિલા રહેશે. સુરતમાં પાંચ વર્ષની મુદતમાં મહિલા અને જનરલ કેટેગરીના મેયર મળશે. વડોદરાને અઢી વર્ષ માટે પછાત વર્ગના મહિલા અને અઢી વર્ષ માટે અનુસૂચિત જાતિમાંથી મેયર મળશે. રાજકોટને અઢી-અઢી વર્ષની મુદત માટે અનુસૂચિત જાતિના મહિલા અને જનરલ કેટેગરીમાંથી મળશે. આ સાથે ભાવનગર અને જામનગરને મહિલા અને સામાન્યા, જૂનાગઢને મહિલા(બેકવર્ડ ક્લાસ) અને સામાન્યને અઢી-અઢી વર્ષની મુદત મળશે.