બગદાદ
ઇરાકની સંસદે મંગળવારે ઇસ્લામિક દેશમાં બાળ લગ્નને કાયદેસર બનાવતા વિવાદાસ્પદ સુધારેલા બિલને મંજૂરી આપી હતી. દાયકાઓના જૂના કાયદામાં સુધારો કર્યા બાદ હવે 9 વર્ષથી નાની વયની છોકરીઓના લગ્ન થઈ શકશે.
ઈરાકી સંસદની વેબસાઈટ જણાવે છે કે તેણે ‘વ્યક્તિગત સ્થિતિ કાયદામાં સુધારો કરવાની દરખાસ્ત’ તેમજ ’એમ્નેસ્ટી કાયદામાં બીજો સુધારો’ સ્વીકાર્યો છે. મહિલા અધિકાર જૂથોએ આ કાયદાઓ પસાર થવાને ભયાનક ગણાવ્યા છે. તેઓ કહે છે કે તે બાળ બળાત્કારને કાયદેસર બનાવશે.
ઇરાકમાં મહિલાઓ માટે લગ્ન માટેની લઘુત્તમ વય અગાઉ 18 વર્ષ હતી, પરંતુ નવો સુધારા પછી મૌલવીઓને લગ્ન, છૂટાછેડા અને બાળ સંભાળ સહિતની પારિવારિક બાબતો અંગે નિર્ણય લેવાનો અધિકાર આપાયો છે.
કાયદાના સૌથી અગ્રણી વિરોધીઓમાંના એક વકીલ મોહમ્મદ જુમાએ કહ્યું, “અમે ઇરાકમાં મહિલાઓ અને બાળકોના અધિકારોના અંત સુધી પહોંચી ગયા છીએ.” ઇરાકી પત્રકાર સાજા હાશિમે કહ્યું કે, મૌલવીઓ મહિલાઓનું ભાવિ નક્કી કરે તે હકીકત ભયાનક છે. હું એક સ્ત્રી તરીકે મારા જીવનમાં આવતી દરેક વસ્તુથી ડરું છું.
ગાર્જિયનના અહેવાલ મુજબ, ઇરાકમાં બહુમતી શિયા મુસ્લિમોમાં છોકરીઓ માટે લગ્નની લઘુત્તમ વય 15 વર્ષ હશે, જ્યારે સુન્ની મુસ્લિમો માટે તે 15 વર્ષ હશે. રિપોર્ટમાં સાંસદ સજ્જાદ સલીમને ટાંકીને કહેવામાં આવ્યું છે કે, રાજ્યએ ક્યારેય આટલી અધોગતિ અને અપવિત્રતા જોઈ નથી જેણે તેની સંપત્તિ અને પ્રતિષ્ઠાને નુકસાન પહોંચાડ્યું છે જે આપણે આજે જોઈ રહ્યા છીએ.
ઇરાકમાં બાળ લગ્ન લાંબા સમયથી ચાલી આવતી સમસ્યા છે. વર્ષ 2023માં સંયુક્ત રાષ્ટ્રના સર્વેક્ષણમાં જાણવા મળ્યું છે કે, દેશમાં 28 ટકા છોકરીઓના લગ્ન 18 વર્ષની ઉંમર પહેલા થઈ જાય છે.
નાની ઉંમરની છોકરીઓને ગરીબીમાંથી બચવાની તક આપી યુવાનો દ્વારા લગ્નની ઓફર કરવામાં આવે છે. ખૂબ જ નાની ઉંમરમાં કરેલા લગ્નો નિષ્ફળ જાય છે, જેથી યુવા સ્ત્રીઓને આજીવન ખરાબ પરિણામો ભોગવવા પડે છે.
