નવી દિલ્હી – ક્રેડાઈ, કોલિયર્સ અને લીઝ ફોરાસના એક અહેવાલ અનુસાર ડિસેમ્બર ત્રિમાસિક દરમિયાન આઠ મોટા શહેરોમાં મજબૂત માંગ અને ઊંચી પડતર કિંમતોને કારણે આવાસની કિંમતોમાં સરેરાશ 10 ટકાનો વધારો થયો હતો.
રિયલ્ટર્સની સંસ્થા ક્રેડાઈ, રિયલ એસ્ટેટ કન્સલ્ટન્ટ કોલિયર્સ ઇન્ડિયા અને ડેટા એનાલીટીક કંપની લાયસ ફોરાસે મંગળવારે તેમનો સંયુક્ત અહેવાલ બહાર પાડ્યો હતો, જેમાં દર્શાવવામાં આવ્યું હતું કે દિલ્હી રાષ્ટ્રીય રાજધાની ક્ષેત્રમાં ઓક્ટોબર-ડિસેમ્બર 2024 દરમિયાન વાર્ષિક 31 ટકાની મહત્તમ વૃદ્ધિ જોવા મળી હતી.
રસપ્રદ વાત એ છે કે, 2021થી શરૂ થતા સતત 16મા ત્રિમાસિક ગાળામાં આવાસની સરેરાશ કિંમતોમાં વધારો થઈ રહ્યો છે. તમામ આઠ મુખ્ય શહેરોમાં કિંમતોમાં વધારો જોવા મળ્યો હતો.
ક્રેડાઈના રાષ્ટ્રીય અધ્યક્ષ બોમન ઈરાનીએ જણાવ્યું હતું કે, “આવાસની કિંમતોમાં સતત વૃદ્ધિ ઘર ખરીદનારાઓમાં મજબૂત વિશ્વાસને દર્શાવે છે, જે વૈભવી જીવન અને જીવનશૈલીમાં સુધારા પ્રત્યેના અભિગમથી પ્રેરિત છે”.
“જ્યારે વિકસતી પસંદગીઓ અને જીવનશૈલીમાં સુધારા મુખ્ય પ્રેરકો છે, ત્યારે બાંધકામ અને જમીન સંપાદનમાં ખર્ચનું દબાણ પણ કિંમતના વલણોમાં નોંધપાત્ર યોગદાન આપી રહ્યું છે “, એમ ઈરાનીએ જણાવ્યું હતું.
કોલિયર્સ ઇન્ડિયાના ચીફ એક્ઝિક્યુટિવ ઓફિસર બાદલ યાગ્નિક માને છે કે 2025માં ટોચના આઠ શહેરોમાં સરેરાશ કિંમતોમાં આવો જ વધારો જોવા મળી શકે છે. “આગળ જતાં, બેન્ચમાર્ક ધિરાણ દરોમાં વધુ ઘટાડાની શક્યતા સાથે, મોટાભાગના શહેરોમાં તમામ શ્રેણીઓમાં આવાસના વેચાણમાં વધારો થવાની સંભાવના છે. પરિણામે, વાર્ષિક ધોરણે 2025માં સરેરાશ આવાસોની કિંમતોમાં સમાન સ્તરે સંભવિત વધારો થઈ શકે છે “, એમ યાગ્નિકે જણાવ્યું હતું.
લિયાસેસ ફોરાસના મેનેજિંગ ડિરેક્ટર પંકજ કપૂરે જણાવ્યું હતું કે છેલ્લા ત્રિમાસિક ગાળામાં મધ્યમ નવા લોંચની આગેવાનીમાં વેચાણમાં નજીવો ઘટાડો જોવા મળ્યો હતો.
“અમે આગળ જતાં એફોર્ડેબલ અને મધ્યમ સેગમેન્ટના પુરવઠા અને વેચાણમાં વૃદ્ધિની અપેક્ષા રાખીએ છીએ, છેલ્લા ચાર વર્ષથી લક્ઝરી સેગમેન્ટ તરફ ઝૂકાવ ધરાવતાં સપ્લાયની દિશા બદલાવાની પણ અપેક્ષા છે”, કપૂરે કહ્યું.
શહેરોમાં, 2024ના ઓક્ટોબર-ડિસેમ્બરના સમયગાળા દરમિયાન અમદાવાદમાં ઘરોની સરેરાશ કિંમત વાર્ષિક 15 ટકા વધીને રૂ.7,725 પ્રતિ ચોરસ ફૂટ થઈ હતી.
બેંગલુરુમાં કિંમતો 23 ટકા વધીને રૂ. 12,238 પ્રતિ ચોરસ ફૂટ થઈ હતી. ચેન્નાઈમાં આવાસની કિંમતો 6 ટકા વધીને રૂ.8,141 પ્રતિ ચોરસ ફૂટ થઈ હતી, જ્યારે દિલ્હી-NCRમાં 31 ટકા વધીને રૂ. 11,993 પ્રતિ ચોરસ ફૂટ થઈ હતી. હૈદરાબાદમાં ભાવ 2 ટકા વધીને રૂ. 11,351 પ્રતિ ચોરસ ફૂટ થયા હતા. કોલકાતામાં કિંમતો 1 ટકા વધીને રૂ. 7,971 પ્રતિ ચોરસ ફૂટ થઈ ગઈ છે.
મુંબઈ મેટ્રોપોલિટન ક્ષેત્ર (એમ.એમ.આર.) એ કિંમતોમાં 3 ટકાનો વધારો નોંધાવીને રૂ. 20,725 પ્રતિ ચોરસ ફૂટનો ભાવ નોંધાવ્યો હતો.
અંતે, પૂણેમાં સમીક્ષા હેઠળના સમયગાળા દરમિયાન વાર્ષિક ભાવ 9 ટકા વધીને રૂ. 9,982 પ્રતિ ચોરસ ફૂટ થયો હતો, એમ આંકડા દર્શાવે છે.
