સ્પેન અને ફ્રાન્સ વચ્ચે આવેલા એન્ડોરાએ સલામતીના પ્રભાવશાળી 84.7ના સ્કોર સાથે ટોચના સ્થાન
વિશ્વની સૌથી મોટી ઑનલાઇન ડેટાબેઝ સર્બિયન એજન્સી નુમ્બિઓ દ્વારા જાહેર કરવામાં આવેલી 2025ના વિશ્વના સુરક્ષિત દેશોની યાદીમાં અમેરિકા 89મા ક્રમાંકે છે, જ્યારે ભારત 66મા અને પાકિસ્તાન 65મા : ક્રમાંકે છે. આમ અમેરિકા કરતાં ભારત અને પાકિસ્તાન વધુ સુરક્ષિત છે.
આ લિસ્ટ તૈયાર કરવા માટે દિવસે અને રાત્રે ચાલતી વખતે રહેવાસીઓ પોતાને કેટલા સલામત માને છે તથા લૂંટ, ચોરી, કારચોરી, અજાણ્યા લોકો દ્વારા થતા શારીરિક હુમલા, જાહેર સ્થળો પર હેરાનગતિ, રંગભેદ, વંશવાદ અને ધર્મના આધારે ભેદભાવ જેવાં પરિબળો પર આધાર રાખવામાં આવ્યો હતો.
આ સિવાય ઘરફોડી, સંપત્તિની તોડફોડ, હત્યા, જાતીય અત્યાચાર જેવા હિંસક ગુનાઓ પર પણ ધ્યાન આપવામાં આવ્યું હતું. સ્પેન અને ફ્રાન્સ વચ્ચે આવેલા એન્ડોરાએ સલામતીના પ્રભાવશાળી 84.7ના સ્કોર સાથે ટોચનું સ્થાન મેળવ્યું છે.
આ દેશ ટચૂકડો છે જેનો વિસ્તાર 121 ચોરસ માઇલ છે અને વસ્તી 82,638 છે. એન્ડોરા બાદ બીજા કમાંકે યુનાઇટેડ આરબ એમિરેટ્સ (84.5), કતર (84.2), તાઇવાન (82.9) અને ઓમાન (81.7) છે. 78.5ના સ્કોર સાથે હોન્ગકોન્ગ છઠ્ઠા ક્રમાંકે, 77.4ના સ્કોર સાથે સિંગાપોર નવમા ક્રમાંકે અને 77.1ના સ્કોર સાથે જપાન દસમા ક્રમાંકે છે.
સૌથી ખતરનાક દેશોમાં પહેલા ક્રમાંકે વેનેઝુએલા, ત્યાર બાદ પપુઆ ન્યુ ગિની, હૈતી, અફઘાનિસ્તાન, સાઉથ આફ્રિકા, હોન્ડુરસ, ટ્રિનિડેડ ઍન્ડ ટબેંગો, સિરિયા, જમૈકા અને પેરુનો સમાવેશ છે.
