મફત રાશન લેવાની વૃતિ વધી છે, કોવિડ કાળ અલગ હતો : સુપ્રિમની ટકોર
નવી દિલ્હી : સુપ્રીમ કોર્ટે મંગળવારે મફત રાશન પર આકરી ટિપ્પણી કરી હતી. સુપ્રીમ કોર્ટે કહ્યું કે, રાશનકાર્ડ પર મફત ખોરી વધી રહી છે. કોવિડનો સમયગાળો અલગ હતો, જ્યારે સ્થળાંતર કામદારોને રાહત આપવા માટે મફત રાશન આપવામાં આવ્યું હતું. મંગળવારે જસ્ટિસ સૂર્યકાન્ત અને જસ્ટિસ ઉજ્જવલ ભુયાનની બેંચે તમામ પરપ્રાંતીય કામદારો માટે મફત રાશનની માંગ કરતી એક એનજીઓ દ્વારા દાખલ કરવામાં આવેલી અરજી પર સુનાવણી કરી હતી. એનજીઓના વકીલ પ્રશાંત ભૂષણે કહ્યું કે, સુપ્રીમ કોર્ટે ઈ-શ્રમ પોર્ટલ પર નોંધાયેલાં તમામ કામદારોને મફત રાશન અને રેશન કાર્ડ આપવાનો નિર્દેશ આપ્યો હતો, પરંતુ તેમ થઈ રહ્યું નથી. તેનાં પર જસ્ટિસ કાંતે કહ્યું કે, રેશન કાર્ડ એક મહત્વપૂર્ણ સત્તાવાર દસ્તાવેજ છે જે વ્યક્તિની ઓળખ અને અધિકારો સાથે જોડાયેલ છે. મુશ્કેલી ત્યારે આવે છે જ્યારે આપણે મફતમાં મળતી વસ્તુઓ પર વધુ ધ્યાન આપીએ છીએ. હવે તેમાં વધારો થઈ રહ્યો છે. કોવિડનો સમય અલગ હતો, પરંતુ હવે આપણે તેનાં પર વિચાર કરવો પડશે. કેન્દ્ર સરકાર તરફથી હાજર રહેલાં સોલિસિટર જનરલ તુષાર મહેતાએ અરજદારના વકીલ ભૂષણની દલીલો સામે વાંધો ઉઠાવ્યો હતો. તેમણે કહ્યું કે, સરકાર 2013ના રાષ્ટ્રીય ખાદ્ય સુરક્ષા અધિનિયમથી બંધાયેલી છે અને કાયદાકીય રીતે જે પણ સત્તા આપવામાં આવશે તે આપવામાં આવશે. કોવિડ દરમિયાન, એવી કેટલીક એનજીઓ હતી જેણે રોગચાળા દરમિયાન ગ્રાઉન્ડ લેવલ પર કામ કર્યું ન હતું અને તે એફિડેવિટ પર કહી શકે છે કે અરજદાર તે એનજીઓમાંથી એક છે. ખંડપીઠે કહ્યું કે, આ દાવો વિરોધી નથી અને કોર્ટ બંને પક્ષોને સમાવવા માટે એક સામાન્ય કારણ શોધવાનો પ્રયાસ કરશે. કેસની આગામી સુનાવણી 9 ડિસેમ્બરે થશે.આ કેસમાં, 2 સપ્ટેમ્બરના રોજ, સર્વોચ્ચ અદાલતે કેન્દ્રને 2021 અને તે પછીનાં સ્થળાંતર કામદારોને રેશન કાર્ડ અને અન્ય કલ્યાણના પગલાં પ્રદાન કરવા માટેના તેનાં નિર્દેશોનું પાલન કરવાની વિગતો આપતું એફિડેવિટ ફાઇલ કરવા કહ્યું હતું. આના પર, કેન્દ્રએ કહ્યું હતું કે તે રાષ્ટ્રીય ખાદ્ય સુરક્ષા કાયદા હેઠળ પાત્રતા ધરાવતાં તમામ લોકોને રાશન પ્રદાન કરી રહ્યું છે.
