2024

આદિત્ય એલ 1 અગાઉથી સંભવિત ખતરાની જાણકારી આપી શકે : સૂર્યમાંથી ઉઠતા આગના ગોળા 15 કલાકમાં પૃથ્વીને ભસ્મીભૂત કરી શકે નવી દિલ્હી: વૈજ્ઞાનિકોનું કહેવું છે કે, જો સૂર્યમાંથી કોઈ આગનો ગોળો ઉઠે છે તો તેને ધરતી સુધી પહોંચવામાં માત્ર 15 કલાકનો સમય લાગે છે. એટલું જ નહી. આ આગનો ગોળો પૃથ્વી પર ત્રાટકે તો પૃથ્વીને 15 કલાકમાં ખતમ કરી શકે છે. આ મામલે ભારતનું પ્રથમ સૂર્ય મિશન આદિત્ય એલ વન આવા ખતરાથી અગાઉથી એલર્ટ કરી સંકટ મોચક બની શકે છે. ભારતનું પ્રથમ સૂર્ય મિશન આદિત્ય એલ 1 અંતરિક્ષમાં રહીને કમાલ કરી રહ્યો છે. આદિત્ય એલ 1 એ ધરતી પર એવા ડેટા મોકલ્યો છે કે જે ભારત જ નહીં, બલ્કે પુરી દુનિયાને સંકટથી બચાવનાર છે. સૂર્ય પર સતત આગના ગોળા ઉઠતા રહ્યા છે, જે ધરતીના ઈન્ફ્રાસ્ટ્રકચર અને ઉપગ્રહોને નુકસાન પહોંચાડી શકે છે. ઈસરોના વૈજ્ઞાનિકોનું કહેવું છે કે આદિત્ય એલ 1 હવે સૌર તોફાનના પ્રારંભીક ખતરાની જાણકારી પહેલાથી આપી શકે છે. આથી આગામી સમયમાં જયારે પણ સૂર્ય પર થઈ રહેલી ગતિવિધિઓના કારણે પાયાના માળખા પર કોઈ ખતરો આવશે તો તેને દુર કરવામાં મદદ મળશે. ઉલ્લેખનીય છે કે આદિત્ય એલ-1 પર 7 ઉપકરણ લગાવવામાં આવ્યા છે. જે સતત ડેટા કલેકશન પર કામ કરી રહ્યા છે અને ધરતી પર મોકલી રહ્યા છે.આદિત્ય એલ 1 માં વિઝીબલ એમીશન લાઈન કોરોનાગ્રાફ નામનું યંગ લગાવવામાં આવ્યું છે. આ કોરોનલ માસ ઈંજેકશનનો સાચો સમય બતાવી દે છે. સીએમઈ સૂર્યના બહારના પડ કોરોનાથી નીકળતા આવેશિત કણોના કારણે થનારા વિસ્ફોટને સૌર તોફાન કહે છે. તેનું અધ્યયન સૌર મિશનના મુખ્ય ઉદેશમાં સામેલ છે. એક અહેવાલ મુજબ આગના ગોળા આવેશિત કણોના મળીને બને છે અને તેમનું વજન એક ટ્રિલિયન કિલોગ્રામ વધુ હોય છે. આ ગોળા 3 હજાર કિલોમીટર પ્રતિ સેકંડની ગતિએ આગળ વધે છે તે પૃથ્વી પર પણ આવી શકે છે, પણ તેની સંભાવના ઓછી જ રહે છે. જો આ આગનો ગોળો પૃથ્વી તરફ આગળ વધે તો 15 કલાકમાં જ પૃથ્વી ગળી જઈ શકે છે. આવો એક ગોળો પૃથ્વી તરફ પેદા થયો હતો પણ સદભાગ્યે કોઈ કારણે તે પાછળ તરફ ચાલ્યો ગયો હતો.

મુંબઈ: બેન્કો સહિત નાણાકીય સંસ્થાઓમાં અને ખાતેદારો સાથે વધતા જતા સાયબર ફ્રોડને ડામવા હવે આર્ટીફિશ્યલ ઈન્ટેલીજન્સ ભારતીય બેન્કોની મદદે આવશે. બેન્કોમાં સાયબર ફ્રોડ કે પછી ડીજીટલ એરેસ્ટ કે તે પ્રકારે લોકોના બેન્ક ખાતાઓથી નાણા મેળવી લેવા અને તે પછી ફ્રોડ આચરનાર સુધી પહોચે તે માટે વચ્ચે ‘મ્યુલ’- એટલે કે ડમી-એકાઉન્ટનો ઉપયોગ કરવામાં આવે છે. બેન્કોમાં અન્ય કોઈના આઈડી આ પ્રકારે ડમી ખાતા ખોલાય છે. જેમાં ખાતેદારને જાણ પણ હોતી નથી અથવા તો તેને ચોકકસ રકમની લાલચ આપવામાં આવે છે અને આ ખાતાનો ઉપયોગ ફ્રોડથી નાણા મેળવવા અને તે પછી ટ્રાન્સફર કરવા ખાતે ઉપયોગ થાય છે. હાલમાં જ એક ખાનગી બેન્કના કર્મચારીઓ પણ આ પ્રકારે મ્યુલ એકાઉન્ટ ચલાવતા હતા અને તગડું કમીશન મેળવતા હતા તે બહાર આવ્યુ છે. રીઝર્વ બેન્ક ઓફ ઈન્ડીયાએ સરકારી અને ખાનગી ક્ષેત્રની બેન્કોની સાથે હવે બેન્કોમાં આ પ્રકારના ખાતાઓ જેમાં ચોકકસ પેટર્નની નાણાની આવક જાવક થાય છે તે પારખવા માટે આર્ટિફીશ્યલ એકાઉન્ટનો સહારો લેવા જણાવાયું છે. આ માટે એક ખાસ ટુલ તૈયાર થયુ છે. જેમાં બેન્ક ફ્રોડની વિવિધ 28 વિવિધ પદ્ધતિઓના ડેટા ફીડ કરાયા છે અને તેના પરથી એક પ્લેટફોર્મ તૈયાર કરીને બેન્કોના તેનો ઉપયોગ કરવા જણાવાશે. જે બેન્ક ખાતા મારફત નાણાની ફ્રોડ વધવા ગેરકાનુની રીતે હેરફેર થતી તેને મ્યુલ-એકાઉન્ટ તરીકે ઓળખવામાં આવે છે. બેન્કોમાં જે ખાતા ઈન ઓપરેટીવ હોય છે જેમાં કેવાયસી પણ સમયસર થયું હોય તેવું નથી તે ખાતામાં પણ બેન્કોના કર્મચારીઓની મદદથી ગેરકાનુની વ્યવહારો કરવામાં આવે છે જે આ ટુલ પકડી લેશે. રીઝર્વ બેન્કના ઈનોવેટીવ હબ દ્વારા હવે 10 બેન્કોને આ પ્લેટફોર્મ પર લાવવામાં આવી રહી છે. બેન્કો હાલ આ પ્રકારના ઓળખ ટૂલ-બેઝ-સીસ્ટમનો ઉપયોગ કરે છે પણ તેમાં છેલ્લે એને ચકાસણીનો મેન્યુઅલ જ કરવાની હોય છે જે સમય લે છે અને તેની ચોકકસતા પણ પ્રશ્ન ઉભા કરે છે જેની સામે આ નવું ટુલ એ ત્રણ ગણુ ઝડપી અને વધુ ચોકકસ છે. હાલમાંજ મુંબઈમાં ગ્લોબલ ફીનટ્રેક ફેસ્ટીવલમાં વડાપ્રધાન નરેન્દ્ર મોદીએ ટેકનોલોજી નિષ્ણાંતોને સાયબર ફ્રોડ રોકવા કોઈ આધુનિક વ્યવસ્થા ઉભી કરવા પર ભાર મુકયો હતો. જો કે સાયબર કે બેન્કીંગ ફ્રોડ એ અનેક ચેનલો દ્વારા થાય છે અને બેન્કીંગ સીસ્ટમનો ભરપુર લાભ ઉઠાવાય છે જેથી આ પ્રકારના મ્યુલ-એકાઉન્ટ જો ઝડપથી ઓળખવામાં આવે તો ફ્રોડ પર લગામ મુકી શકાય છે. આ વર્ષના પ્રથમ 15 માસમાં જ સાયબર ફ્રોડની રૂા.11333 કરોડ લોકોએ ગુમાવ્યા છે. તમારી બેન્કીંગ સલામત નથી ♦ કાર્ડ-ઈન્ટરનેટ આધારીત વ્યવહારોમાં ફ્રોડ વધ્યા.♦ 2020 થી 2024 વચ્ચે 5.82 લાખ કેસ: રૂા.3297 કરોડ આ પ્રકારે ફ્રોડથી ગયા

સુપ્રીમ કોર્ટનાં જજે બેકાબૂ મુસાફરો માટે પગલાં લેવાની માંગ કરતી અરજીની સુનાવણી વખતે તેમનો અનુભવ શેર કર્યો નવી દિલ્હી : સુપ્રીમ કોર્ટનાં જસ્ટિસ કે.વી. વિશ્વનાથને મંગળવારે કહ્યું કે, તેમને અને જસ્ટિસ સૂર્યકાંતને તાજેતરમાં એક ફ્લાઈટમાં ખૂબ જ ખરાબ અનુભવનો સામનો કરવો પડ્યો હતો. જેમાં સવાર બે યાત્રીઓ નશામાં ધૂત હતાં. જસ્ટિસ વિશ્વનાથને બોર્ડમાં બેકાબૂ મુસાફરો સાથે વ્યવહાર કરવા માટે પગલાં જારી કરવાની માંગ કરતી અરજીની સુનાવણી કરતી વખતે તેમનો અનુભવ શેર કર્યો હતો. બેંચમાં જસ્ટિસ વિશ્વનાથન સાથે જસ્ટિસ બીઆર ગવઈ પણ સામેલ હતાં.  જસ્ટિસ વિશ્વનાથને કહ્યું કે, અમને તાજેતરમાં હવાઈ મુસાફરી દરમિયાન કડવો અનુભવ થયો હતો. બે પુરૂષ મુસાફરો સંપૂર્ણપણે નશામાં હતાં. તેમાંથી એક શૌચાલયમાં ગયો અને ત્યાં સૂઈ ગયો. અન્ય એક, જે બહાર હતો, તેની પાસે ઉલ્ટી કરવા માટે બેગ હતી.”  “ક્રૂ મેમ્બર તમામ મહિલાઓ હતી,” તેમણે કહ્યું કે, 30 થી 35 મિનિટ સુધી કોઈ દરવાજો ખોલી શક્યું ન હતું. આ પછી ફ્લાઈટ એટેન્ડન્ટે મુસાફરને દરવાજો ખોલીને સીટ પર લઈ જવાં વિનંતી કરી હતી. તે 2:40 કલાકની ફ્લાઇટ હતી.”  જસ્ટિસ વિશ્વનાથને સોલિસિટર જનરલ ઐશ્વર્યા ભાટીને કહ્યું કે, સત્તાવાળાઓએ બેકાબૂ હવાઈ મુસાફરો સાથે વ્યવહાર કરવા માટે ’ક્રિએટિવ’ ઉકેલ શોધવો જોઈએ. તેમણે કહ્યું કે, મુસાફરોને સમાવવા માટે વ્યૂહાત્મક યોજના બનાવવાની જરૂર છે. નવેમ્બર 2022 માં એર ઈન્ડિયાની ફ્લાઈટમાં નશામાં ધૂત એક વ્યક્તિએ 72 વર્ષીય મહિલા પેસેન્જર પર પેશાબ કર્યો હતો. આ માટે આવેલી અરજી પર સુપ્રીમ કોર્ટ સુનાવણી કરી રહી હતી. શંકર મિશ્રા પર ન્યૂયોર્કથી દિલ્હી આવી રહેલી એર ઈન્ડિયાની ફ્લાઈટમાં એક મહિલા સહ-યાત્રી પર પેશાબ કરવાનો આરોપ હતો. આ ઘટના 26 નવેમ્બર 2022ના રોજ એરક્રાફ્ટનાં બિઝનેસ ક્લાસમાં બની હતી. 

દિલ્હી   :   સિંગાપોરથી દિલ્હી આવી રહેલાં પ્લેનમાં ત્યારે હંગામો મચી ગયો જ્યારે પાર્કિંગ-વે પર પાર્ક કરેલું પ્લેન ધીમે-ધીમે પાછળ જવા લાગ્યું. આ જોઈને પાઈલટને અચાનક ખ્યાલ આવ્યો કે તે બ્રેક લગાવવાનું ભૂલી ગયો છે. આ પછી સિંગાપોર એરલાઈન્સના પાઈલટે તરત જ બ્રેક લગાવી દીધી હતી. ત્યારબાદ તરત જ એર ટ્રાફિક કંટ્રોલ અને ગ્રાઉન્ડ સ્ટાફને મામલાની જાણ કરવામાં આવી હતી.આ ઘટના આઇજીઆઇ એરપોર્ટના ટર્મિનલ-3 પર બની હતી. આ પ્લેનમાં સવાર તમામ મુસાફરો સુરક્ષિત છે. એરક્રાફ્ટમાં તૈનાત એક ક્રૂ મેમ્બરને તેની જાંઘ પર સામાન્ય ઈજા થઈ છે, જેની સારવાર કરવામાં આવી છે અને તેને ફરજ પર પરત જવા દેવામાં આવ્યો છે.સિંગાપોર એરલાઇન્સનું એરબસ એ380 એરક્રાફ્ટ સોમવારે સિંગાપોરથી દિલ્હી આઇજીઆઇ એરપોર્ટ પર પહોંચ્યું હતું. પાયલોટે પેસેન્જર્સ સાથે પ્લેન પાર્કિંગ વે પર પાર્ક કર્યું હતું. આ દરમિયાન પાયલોટે મોટી ભૂલ કરી કે તે પ્લેન પાર્ક કર્યા બાદ બ્રેક લગાવવાનું ભૂલી ગયો હતો.એવું કહેવામાં આવ્યું હતું કે પાર્કિંગ વે પર ઢાળના કારણે જ્યારે પ્લેન ધીમે ધીમે પાછળની તરફ જવા લાગ્યું ત્યારે મુસાફરો અને પાયલટને આની જાણ થતાં પાયલટે તરત જ પાર્કિંગ બ્રેક લગાવી દીધી હતી. આ અંગે એર ટ્રાફિક કંટ્રોલ અને ગ્રાઉન્ડ સ્ટાફને પણ જાણ કરી હતી. આ પછી પાઇલટ અને મુસાફરો બંનેએ રાહતનો શ્વાસ લીધો હતો. એરક્રાફ્ટ સ્થિર થયાં પછી, પાઇલોટ્સે વિમાનને સલામત રીતે પાર્કિંગ માર્ગ પર પાછું ખસેડ્યું હતું. આ પછી મુસાફરોને સુરક્ષિત નીચે ઉતારવામાં આવ્યાં હતાં.સદનસીબે પ્લેનની આજુબાજુ કોઈ વાહન કે અન્ય એરક્રાફ્ટ પાર્ક કરવામાં આવ્યું ન હતું, અન્યથા મોટી દુર્ઘટના થઈ શકી હોત. સિંગાપોર એરલાઈન્સે આ ઘટના પર મુસાફરોને પડેલી અસુવિધા માટે માફી માંગી છે.

નવી દિલ્હીઃભારતીય અબજોપતિ ગૌતમ અદાણી અને તેમની કંપની પર લાગેલા આરોપોને અદાણી ગ્રીન એનર્જી દ્વારા ફગાવી દેવામાં આવ્યા છે અને આ લાંચના આરોપો સાથે જોડાયેલા અહેવાલોને પાયાવિહોણા અને ખોટા ગણાવ્યા છે. આ મામલામાં હવે દેશના સૌથી મોટા વકીલોમાંથી એક અને પૂર્વ એટર્ની જનરલ મુકુલ રોહતગીએ આજે બુધવારે પ્રેસ કોન્ફરન્સ કરી હતી અને કહ્યું કે, અમેરિકન તપાસમાં ગૌતમ અદાણીને ચાર્જશીટમાં આરોપી બનાવવામાં આવ્યા નથી. આ ઉપરાંત વરિષ્ઠ વકીલ મહેશ જેઠમલાણીએ પણ પોતાનો અભિપ્રાય આપ્યો હતો. આ મામલા અંગે પૂર્વ એટર્ની જનરલ અને વરિષ્ઠ વકીલ મુકુલ રોહતગીએ પ્રેસ કોન્ફરન્સ કરી અને કહ્યું કે, હું અદાણી ગ્રુપનો પ્રવક્તા તરીકે નથી બોલી રહ્યો, પરંતુ આ સમગ્ર આરોપમાં 5 આરોપો અથવા કલમો સામેલ છે, જેમાંથી કલમ 1 અને 5 સૌથી મહત્વપૂર્ણ છે અને બંનેમાં, ગૌતમ અદાણી અને તેમના ભત્રીજા સાગર અદાણી પર આરોપ મૂકવામાં આવ્યો નથી. મુકુલ રોહતગીએ વધુમાં કહ્યું કે, ગૌતમ અદાણી કે સાગર અદાણી બંને પર FCPA હેઠળ આરોપ મૂકવામાં આવ્યો નથી, જે ભારતના ભ્રષ્ટાચાર નિવારણ કાયદા સમાન છે. કલમ 5 હેઠળ લગાવવામાં આવેલા આરોપોમાં આ બેના નામ નથી પરંતુ કેટલાક વિદેશી વ્યક્તિઓના નામ સામેલ છે. વરિષ્ઠ વકીલ મુકુલ રોહતગીના જણાવ્યા અનુસાર, ચાર્જશીટમાં સ્પષ્ટપણે જણાવવું પડે છે કે વ્યક્તિએ આવું કૃત્ય કર્યું છે. જે રીતે આરોપ લગાવવામાં આવ્યા છે કે અદાણી તરફથી ભારતીય સંસ્થાઓને લાંચ આપવામાં આવી છે, પરંતુ ચાર્જશીટમાં એક પણ નામ જોવા મળ્યું રહ્યું નથી અને ન તો એ જોવા મળી રહ્યું છે કે કેવી રીતે તેમને લાંચ આપવામાં આવી, તે કયા વિભાગ સાથે સંબંધિત છે. મુકુલ રોહતગીએ કહ્યું કે, મને ખાતરી છે કે ગૌતમ અદાણી અને તેમની કંપની આ અંગે અમેરિકન વકીલો પાસેથી કાયદાકીય સલાહ લેશે. કાઉન્ટ 1 અને 5 અન્ય કેટલીક સંસ્થાઓના નામ પણ આપે છે. આ ઉપરાંત, ગૌતમ અદાણી પર લાંચના આરોપ મુદ્દે વરિષ્ઠ વકીલ મહેશ જેઠમલાણીએ પોતાનો અભિપ્રાય વ્યક્ત કર્યો અને કહ્યું કે, ચાર્જશીટમાં ભારતમાં કોઈ પણ લાંચની વાત કરવામાં આવી નથી. આરોપ માત્ર એટલો જ છે કે લાંચ આપવાનું કાવતરું ઘડવામાં આવ્યું હતું. ભારતમાં કાયદાના ઉલ્લંઘનના કોઈ પુરાવા રજૂ કરવામાં આવ્યા નથી. જેઠમલાણીએ વધુમાં કહ્યું કે, ગૌતમ અદાણી કે અદાણી ગ્રીન્સ સામે ચાર્જશીટમાં કોઈ આરોપ મૂકવામાં આવ્યો નથી. આ સમગ્ર મામલો અદાણી ગ્રીન એનર્જી દ્વારા બોન્ડ જારી કરવા સાથે સંબંધિત છે. કથિત રીતે ઉલ્લંઘન એ છે કે આ બોન્ડ ધારકોને જાણ કર્યા વિના જારી કરવામાં આવ્યા હતા અને આ ભારતમાં નિયમોનું ઉલ્લંઘન હોવાનું કહેવાય છે. આ ઉપરાંત, મામલો એ છે કે, તમે ભારતમાં લોકોને આ બોન્ડ્સ સબસ્ક્રાઇબ કરવા માટે પ્રેરિત કર્યા. પરંતુ કોંગ્રેસ કે અન્ય કોઈએ ભારતીય કાયદાના ઉલ્લંઘન અંગે કોઈ પુરાવા આપ્યા નથી. વરિષ્ઠ વકીલ મહેશ જેઠમલાણીએ કહ્યું કે, માત્ર આરોપ છે કે લાંચ આપવાનો ઈરાદો હતો. કથિત કાવતરા અંગે કોઈ પુરાવા નથી કે ષડયંત્ર કેમ ઘડવામાં આવ્યું? આ આરોપ અંગેનો ન્યાયિક આદેશ છે અને મને ખબર નથી કે કોર્ટે કયા પુરાવાના આધારે કાર્યવાહી કરી છે. કોંગ્રેસની તપાસની માંગ પર તેમણે કહ્યું કે, જ્યાં સુધી વિપક્ષ ગૌતમ અદાણી વિરુદ્ધ નક્કર પુરાવા લાવે નહીં ત્યાં સુધી તપાસ કે JPC  ન થવી જોઈએ. કાં તો તેઓ સાબિતી લાવે અથવા ઘોંઘાટ કરવાનું બંધ કરે. તથ્યો વિના તેમની ટીકા કરવી અયોગ્ય છે.