રિવરફ્રન્ટમાં ડાઈનિંગ ક્રૂઝ, અટલ બ્રિજ, ફ્લાવર પાર્ક, વોટર સ્પોર્ટ્સ એક્ટિવિટી સહિતના વિવિધ નજરાણાં છે. હવે તેમાં વધુ એક નજરાણું ઉમેરાવા જઈ રહ્યું છે. રિવરફ્રન્ટમાં વધુ એક બેન્કવેટ સુવિધાવાળી એક ક્રૂઝ લાવવા માટે મ્યુનિ.એ તૈયારી કરી લીધી છે, જેમાં લગ્ન સહિતના નાના-મોટા પ્રસંગો કરી શકાય તેવા બેન્કવેટ હોલ સહિતની સુવિધા રહેશે. એટલે કે સાબરમતી રિવરફ્રન્ટના ક્રૂઝમાં હવે લોકો લગ્ન કરીને તેમના જીવનની યાદગાર પળોને વધુ યાદગાર બનાવી શકશે.
આ અંગે મ્યુનિ.નાં સૂત્રોના જણાવ્યા પ્રમાણે હાલમાં સાબરમતી રિવરફ્રન્ટમાં અક્ષર ક્રૂઝ ચાલી રહી છે. તેના બાદ વધુ એક ક્રૂઝ લાવવાનું આયોજન કરવામાં આવ્યું છે. હાલની હયાત ક્રૂઝની સરખામણીમાં નવી ક્રૂઝ મોટી હશે, જેમાં બેંકવેટ હોલ, ડાઈનિંગ એરિયા સહિતની સુવિધાઓ હશે. એટલે લોકો લગ્ન, સગાઈ કે બર્થ-ડે પાર્ટી જેવા પ્રસંગો અહીંયાં ઊજવી શકશે.
આ ક્રૂઝ મોટી હોવાના લીધે તેમાં બેસવાની ક્ષમતા પણ હયાત ક્રૂઝ કરતાં વધારે હશે. જોકે ક્રૂઝની સુવિધા અને બેસવાની ક્ષમતા મામલે હજુ કોઈ સ્પષ્ટતા કરવામાં આવી નથી, પરંતુ આ ક્રૂઝની તમામ વિગતો ટુંક સમયમાં મ્યુનિ.ના સત્તાધીશો દ્વારા જાહેર કરવામાં આવશે. આ મામલે મ્યુનિ.ના સત્તાધીશોને પૂછતાં તેમણે આવતી કાલે માહિતી આપીશું કહીને આગળ વાત કરવાનો ઇનકાર કરી દીધો હતો. જોકે મ્યુનિ.નાં સૂત્રોનું કહેવું છે કે, બીજી ક્રૂઝ આવશે તેનું આખરી આયોજન કરી લેવાયું છે. આ અંગે ટૂંક સમયમાં મ્યુનિ દ્વારા જાહેરાત કરાશે.