શેર બજારમાં ઘટાડાને લઈને અખિલેશે કેન્દ્રની ઝાટકણી કાઢી

લખનઉઃ સમાજવાદી પાર્ટીના વડા અખિલેશ યાદવે મંગળવારે ભારતીય શેર બજારોમાં સતત ઘટાડાને લઈને ભાજપના નેતૃત્વવાળી કેન્દ્ર સરકાર પર આકરા પ્રહારો કર્યા હતા અને દાવો કર્યો હતો કે મધ્યમ વર્ગના રોકાણનો સફાયો થઈ ગયો છે. કન્નૌજના સાંસદે સરકાર પર સ્થાનિક રોકાણકારોનું રક્ષણ કરવામાં નિષ્ફળ રહીને લોકોને ગેરમાર્ગે દોરવાનો પણ આરોપ લગાવ્યો હતો.

યાદવે એક્સ પર એક પોસ્ટમાં કહ્યું, “ભારતીય શેર બજારોમાં ચાલી રહેલા ઘટાડો મધ્યમ વર્ગનું રોકાણ ઓળવી ગયો છે. ‘ડબલ એન્જિન’ સરકારો, જે વિશ્વભરના રોકાણકારોને આમંત્રિત કરવા દોટ લગાવતી રહે છે, તેમણે અન્ય લોકોને બાંહેધરીઓ આપવા માટે ‘ભ્રામક કાર્યક્રમો’ નું આયોજન કરતાં પહેલાં તેમના પોતાના રોકાણકારોની સલામતી સુનિશ્ચિત કરવી જોઈએ.

છેલ્લા કેટલાક મહિનાઓથી નિફ્ટીના સતત નબળા પ્રદર્શનને કારણે, અહેવાલો બહાર આવ્યા છે કે ભારતીય શેર બજારો આ વર્ષે થાઇલેન્ડ અને ફિલિપાઇન્સ પછી ઉભરતા બજારોમાં ત્રીજા ક્રમનું સૌથી નબળું બજાર બની ગયું છે.

“એક તરફ 80 કરોડ લોકો સરકારી રાશન પર ગુજરાન ચલાવવા માટે મજબૂર છે અને બીજી તરફ જેમણે પોતાની બચતનું શેરોમાં રોકાણ કર્યું છે તેઓ કંગાળ બની રહ્યા છે. આવી વિકટ પરિસ્થિતિઓમાં પણ ભાજપ સરકાર ખોટા દાવાઓ કરીને લોકોને ગેરમાર્ગે દોરવાનું ચાલુ રાખે છે. આ આર્થિક છેતરપિંડી બંધ થવી જોઈએ “, તેમ ઉત્તર પ્રદેશના પૂર્વ મુખ્યમંત્રીએ જણાવ્યું હતું. “રોકાણકારો હવે કહી રહ્યા છેઃ હવે ભાજપ નહીં!” યાદવે ઉમેર્યું હતું.

યાદવની ટિપ્પણી ભારતીય શેર બજારોની કામગીરી પરની ચિંતાઓ વચ્ચે આવી છે, જેમાં તાજેતરના મહિનાઓમાં સતત ઘટાડો જોવા મળ્યો છે.