ન્યુયોર્ક : અમેરિકાના રાષ્ટ્રપતિ ડોનાલ્ડ ટ્રમ્પે એક નિવેદનમાં કહ્યું છે કે, એલોન મસ્ક તેમની સરકારમાં પોતાની રીતે કોઈ નિર્ણય લઈ શકતા નથી. મીડિયા સાથે વાત કરતા ટ્રમ્પે કહ્યું, “મસ્ક મારી મંજૂરી વિના કોઈ નિર્ણય લઈ શકતા નથી અને લેશે પણ નહીં.”
ટ્રમ્પે કહ્યું કે ’જ્યાં તે યોગ્ય લાગશે, અમે મસ્કને મંજૂરી આપીશું અને જ્યાં તે યોગ્ય નહીં લાગે, ત્યાં મંજૂરી આપવામાં આવશે નહીં.’ ટ્રમ્પનું આ નિવેદન એવા સમયે આવ્યું છે જ્યારે તાજેતરમાં એવા અહેવાલ આવ્યા હતા કે ટેસ્લાના સીઈઓ એલોન મસ્ક દ્વારા સંચાલિત ડિપાર્ટમેન્ટ ઓફ ગવર્નમેન્ટ એફિશિયન્સી (DOGE) ને યુએસ સરકારના સંવેદનશીલ નાણાકીય ડેટાની ઍક્સેસ મળી ગઈ છે.
ઘણા નેતાઓએ મસ્કની સંવેદનશીલ નાણાકીય ડેટાની ઍક્સેસ પર પ્રશ્નો ઉઠાવ્યા
વિપક્ષી ડેમોક્રેટ પાર્ટીના ઘણા નેતાઓએ મસ્કની સંવેદનશીલ નાણાકીય ડેટાની ઍક્સેસ પર ચિંતા વ્યક્ત કરી હતી. વિપક્ષી કાયદા ઘડનારાઓનું કહેવું છે કે, મસ્ક અને તેમનો વિભાગ ગેરકાયદેસર રીતે ફેડરલ ચૂકવણી રોકી શકે છે, જેનાથી યુએસ અર્થતંત્રને ગંભીર નુકસાન થઈ શકે છે.
મસ્કે કાર્યભાર સંભાળ્યા પછી તરત જ, યુએસ નાણા વિભાગના ટોચના અધિકારી ડેવિડ લેબ્રિકે પણ તેમના પદ પરથી રાજીનામું આપી દીધું. હવે ટ્રમ્પે પોતાના નિવેદન દ્વારા આ ચિંતાઓને નકારી કાઢવાનો પ્રયાસ કર્યો છે.
વ્હાઇટ હાઉસે એક નિવેદનમાં એમ પણ કહ્યું છે કે, એલોન મસ્ક રાષ્ટ્રપતિ ટ્રમ્પના નિર્દેશ પર ખાસ સરકારી કર્મચારી તરીકે કામ કરી રહ્યા છે, પરંતુ તેઓ પૂર્ણ-સમયના ફેડરલ કર્મચારી નથી.
ઉલ્લેખનીય છે કે, અમેરિકન સરકાર એલોન મસ્કની કંપની સ્પેસએક્સને અબજો ડોલરનું ભંડોળ પણ આપે છે. આવી સ્થિતિમાં, જો મસ્ક સરકારમાં ભૂમિકા ભજવે છે તો હિતોના સંઘર્ષની શક્યતા છે અને અમેરિકામાં ઘણા લોકોએ પણ આ અંગે પ્રશ્નો ઉઠાવ્યા છે. જે રીતે એલોન મસ્ક ખુલ્લેઆમ પાછલી સરકારની નીતિઓની ટીકા કરી રહ્યા છે તેનાથી ઘણા લોકો ગુસ્સે થયા છે. એટલું જ નહીં, એલોન મસ્ક પર યુરોપિયન રાજકારણમાં દખલ કરવાનો પણ આરોપ લાગી રહ્યો છે.
