કેપ્ટન શ્રેયસ ઐયર (87 રન, 41 વોલ, 5 ફોર, 8 સિક્સર) અને નેહલ વાઢેરા (48 રન, 29 વોલ, 4 ફોર, 2 સિક્સર) ની મજબૂત ઇનિંગ્સને કારણે, પંજાબ કિંગ્સે ક્વોલિફાયર-2 માં પાંચ વખતના ચેમ્પિયન મુંબઈ ઈન્ડિયન્સને પાંચ વિકેટથી હરાવ્યું અને IPL ટાઇટલ મેચમાં સ્થાન મેળવ્યું.
મંગળવારે ફાઇનલ મેચમાં, તેનો મુકાબલો રોયલ ચેલેન્જર્સ બેંગલુરુ (RCB) સામે થશે, જેની સામે તે પહેલા ક્વોલિફાયરમાં હારી ગયું હતું. પંજાબ અને બેંગ્લોર વચ્ચેની ફાઇનલ પછી, એવું નક્કી થયું કે IPL ને એક નવો ચેમ્પિયન મળશે.
આ બંને ટીમો 18 વર્ષથી પોતાના પ્રથમ ટાઇટલની રાહ જોઈ રહી છે. સૂર્યકુમાર યાદવ અને તિલક વર્માના નેતૃત્વ હેઠળના બેટ્સમેનોના શાનદાર પ્રદર્શનને કારણે મુંબઈ ઈન્ડિયન્સે છ વિકેટે 203 રન બનાવ્યા. લગભગ પોણા બે કલાક મેચ મોડી શરૂ કરી છતાં એક પણ ઓવર ઓછી કરવામાં આવી ન હતી.
મુંબઈના જોની બેયરસ્ટો (38), તિલક વર્મા (44) અને સૂર્યકુમાર યાદવે (44) મુંબઈ માટે મોટા સ્કોરનો પાયો નાખ્યો. નમન ધીરે પણ આખરે 18 બોલમાં 33 રન બનાવીને ટીમને 200 રનનો આંકડો પાર પહોંચાડ્યો.
મુંબઈએ અગાઉ 18 વખત આઈપીએલમાં 200+નો સ્કોર નોંધાવ્યો હતો અને તે બધી મેચ જીતી હતી. પરંતુ નવા કેપ્ટન શ્રેયસના નેતૃત્વમાં, 11 વર્ષ પછી પ્લેઓફમાં પહોંચવાની સિદ્ધિ હાંસલ કરનાર પંજાબની ટીમે IPL માં પહેલા ક્યારેય ન બન્યું હોય તેવું કર્યું.
તેણે મુંબઈનો 200 થી વધુનો સ્કોર છ બોલ બાકી રહેતાં પૂર્ણ કર્યો. પંજાબે પાવરપ્લેમાં જ 55 રનના સ્કોર સાથે બંને ઓપનર ગુમાવ્યા હતા, પરંતુ ત્યારબાદ શ્રેયસ અને વાઢેરાએ માત્ર 47 બોલમાં 84 રનની ભાગીદારી કરીને ટીમનો વિજય નિશ્ચિત કરી દીધો. 16મી ઓવરમાં વાઢેરા આઉટ થયો પણ શ્રેયસે એક છેડો પકડી રાખ્યો અને સિક્સર મારીને મેચનો અંત કર્યો.
આ મહત્વપૂર્ણ મેચમાં સૂર્યકુમાર યાદવે 44 રનની મહત્વપૂર્ણ ઇનિંગ રમીને કેટલાક સીમાચિહ્નો પણ હાંસલ કર્યા. પોતાની ઇનિંગ દરમિયાન, સૂર્યાએ એક સિઝનમાં નોન-ઓપનિંગ બેટ્સમેન દ્વારા સૌથી વધુ રન બનાવવાનો એબી ડી વિલિયર્સનો રેકોર્ડ (687) પણ તોડ્યો.
તેણે આ સિઝનમાં 717 રન બનાવ્યા. તે IPL ના ઇતિહાસમાં એક જ સિઝનમાં 700 રનનો આંકડો પાર કરનાર પ્રથમ મુંબઈ ઈન્ડિયન્સ બેટ્સમેન બન્યો. સૂર્યા એક સિઝનમાં 700 થી વધુ રન બનાવનાર કુલ 12મો ખેલાડી બન્યો.
